Naxsh Bannar Ad

جینۆساید كورد
2014/09/22 21:12
نوسەر: جینۆسایدی کورد

ڕۆژی ئاشتی جیهانی و قسەیەكی پێویست

هۆشیاری عەبدولعەزیز

بە پێ‌ی بڕیاری كۆمەڵەی گشتی نەتەوەیەكگرتووەكان ڕۆژی 21/ئەیلول كراوەتە ڕۆژی ئاشتی جیهانی و هەموو سالێك لەو ڕۆژەدا یادی دەكرێتەوە و گرنگی تایبەتی پێ‌ دەدرێت ، دەستنیشانكردنی وەها رۆژێكیش بۆ گەلان دەگەڕێتەوە بۆ ئەو دۆخەی كە مرۆڤایەتی بە مێژووی جەنگەكان و تووندوتیژیەكان و قوربانیەكاندا بچێتەوە و چیتر بیر لە توندڕەوی و كوشتار و وێرانكاری نەكاتەوە , چونكە ئەگەر سەیری جەنگە خوێناویەكانی سەدەی ڕابردوو بكەین ملیۆنان مرۆڤ بوونە قوربانی گەورەترین سوكایەتی بە كەرامەتی مرۆڤ كراوە و مرۆڤەكان وەك دڕندەیەك بەربوونەتە گیانی یەكتر و یەكتریان كوشتوە و سوتاندووە و لەناوبردووە ، بە درێژای مێژوو مرۆڤە ئاشتی خوازەكان و ڕێكخراوە مرۆڤ دۆستەكان , هەوڵیان داوە كە مرۆڤایەتی بگەڕێننەوە بۆ كەناری ئارامی و ئاشتی و بەیەكەوە ژیان و قبوڵ كردنی یەكتر , دیموكراسیەتیش كە گەشەی كردووە بەرەو چەسپاندنی هەنگاوی نا , لەم ڕوەوە بزووتنەوەی ئاشتی خوازانی جیهان ڕۆڵی بەرچاویان بینیوە و هەوڵەكانیان خزمەتی زۆری بە ئاشتی جیهان كردووە 0
بەڵام پێچەوانە بەو پرۆسە جیهانیە بۆ چەسپاندنی ئاشتی كۆمەڵایەتی لە ساڵی (1963) وە عێراقیەكان بەبێ جیاوازی رەگەزی و ئاینی و نەتەوەی كەوتوونەتە نێو زۆنگاوی شەڕوكوشتاری بەردەوامەوە و رۆژانە سەدان كەس دەبنە قوربانی ململانێ تایفی و ئەتنی و ئاینیەكان و كۆمەڵگای نێودەوڵەتیش لە ئاست ئەو دۆخە دەستە وەستانە و نەیتوانیوە چارەسەرێكی ڕیشەی وەها بۆ ئەو كۆشتارگەیە بدۆزیتەوە كە لانی كەمی نەهامەتیەكانی ڕابردووی ژیانی تاكەكانی كۆمەڵگای عێراقی ساڕێژبكات، چونكەهاوڵاتیانی ئەم نیشتمانە بە كوردستانیشەوە چەرمەسەری و ئێش و ئازارێكی زۆریان چەشتووە بە دەست ڕژێمە دكتاتۆریەكان وئەو سێستەمە سیاسیە دڕندانەیەی كە كۆمەڵگای دابەشكردۆتە سەر نەتەوە و ئەتنیە جیاوازەكان و ئاین و تایفە و ئاینزای بچوك بچوك و هەمووشی لە چوارچێوەی ململانێیەكی مەترسیداری نا دیموكراتیدا كۆكردۆتەوە و بەشەڕی داون ، بەم هۆیەشەوە سەدان هەزار كەس بوونەتە قوربانی و زۆر بە شێوازێكی نامرۆڤانە مامەڵە لەگەڵ خەڵكانی دەرەوەی دەسەڵات كراوە لە نەتەوە و مەزهەبە جیاوازەكان 0
ئەمرۆكەش كە دۆخی عێراق بە هۆی سەرهەڵدانی گروپە توندڕەوە كانەوە بوتەوە گۆڕەپانی یەكلایكردنەوەی كێشمەكێشە سیاسی و ئاینیە مێژویەكان و وەك پانتایەك لە شەڕ دەردەكەوێ پێویستی بە چەسپاندنی تەبای و بەهێزكردنی پایەكانی ئاشتی كۆمەڵایەتی هەیە و دەبێ بە میكانیزمی جۆرا و جۆر چارەسەری ڕیشەی و گونجاو بدۆزرێتەوە بۆ ئەو دۆخە و ئەمەش لە ڕێگەی پتەووكردنی زیاتری دامەزراوە دیموكراسیەكان و چەسپاندنی لە كۆمەڵگای عێراقیدا دەبێ كە گیانی بەیەكەوە ژیان و قبوڵ كردنی ئەوی تر بەرجەستە بكرێت و گفتو گۆ و لەیەكتر تێگەیشتن بكرێتە سترۆكتۆری چارەسەركردنی كێشە و ئاریشە هەڵواسراوەكان. كە سەدەیەكە گەلانی عێراق بەبێ جیاوازی ئەتنی و ئاینی بە دەستیەوە دەناڵێنن و لە دۆزەخی شەڕو كاوڵكاریەكاندا بونەتە سوتەمەنی و رووبەرووی گەورەترین سوكایەتی مرۆی بوتەنەوە و كەسیش ناپرسێ بۆ ..؟

بۆچوون