Naxsh Bannar Ad

جینۆساید كورد
2014/11/05 10:43
نوسەر: جینۆسایدی کورد

مۆزەخانەی نیشتمانی ئەمنە سورەكە فراواندەكرێت

بڕیارە رۆژی شەممەی داهاتوو 8-11-2014 لە مەراسیمێكی تایبەتدا سێ بەشی نوێ و گرنگ لە مۆزەخانەی نیشتمانی ئەمنە سورەكە لە شاری سلێمانی بكرێنەوە.

لەوبارەیەوە ئاكۆ غەریب بەڕێوەبەری گشتی مۆزەخانەی نیشتمانی ئەمنە سورەكە راگەیاندوە: لە هەنگاوێكی نوێداو بۆ پەرەپێدان و فراوانكردنی مۆزەخانەكەمان سێ بەشی گرنگ دەكەینەوە كە بریتین لە هەریەكە لە مۆزەخانەی ئەنفال و مۆزەخانەی مین و هۆڵی سینەمای یەڵماز گۆنای.

وتیشی: هەریەكە لەو بەشانە گرنگی خۆیان هەیەو بەكردنەوەی ئەم بەشانە مۆزەخانەی نیشتمانی ئەمنە سورەكە دەبێتە خاوەنی چەند بەشێكی سەرەكی لەوانە (مۆزەخانەی پێشمەرگە، مۆزەخانەی كلتوری، مۆزەخانەی ئاوێنەكان كە ئەویش تایەبەتە بە ئەنفالەكان، مۆزەخانەی زیندانەكان و كۆڕەو لە داهاتووشدا هەریەك لە مۆزەخانەی ئەنفال و مین و هۆڵی سینەمایی یەڵماز گۆنای دەچێتە سەری.

بەڕێوەبەری گشتی مۆزەخانەی ئەمنە سورەكە راشیگەیاند: ئامانج لە كردنەوەی ئەم بەشانە فراوانكردنی مۆزەخانەی نیشتمانی ئەمنە سورەكەیە، وەك دەزانین ئەم مۆزەخانەیە لە رابردووداو لەسەردەمی رژێمی بەعسدا ناوەندێك بووە بۆ ئەشكەنجەدان و قەتڵوعامی هاووڵاتیان كوردو سڕینەوەی ناسنامەی ئەم گەلە بۆیە دەمانەوێت ئەو مێژوو لێرەدا تۆماربكەین.

سەبارەت بە پڕۆژەی داهاتوویان ئاماژەی بۆئەوەشكرد: پڕۆژەمان هەیە لە ئایندەدا مۆزەخانەكە لە رێكخراوی یۆنیسكۆ دانیپێدابنرێت بكرێتە مۆزەخانیەكی جیهانی.

تایبەتمەندی هەریەك لە مۆزەخانەكانی ئەنفال و مین و هۆڵی سینەمایی یەڵماز گۆنایی:

مۆزەخانەی ئەنفال/ گێڕانەوەی بەشێك لە یادەوەری مەرگەساتەكان و قەتڵوعامی ئەو كوردانەی كە تەنها بە تاوانی كوردبوون ئەنفالكران.

مۆزەخانەی مین/ ئەم مۆزەخانەیە بۆ هەڵماڵینی پەردە لەسەر ئەو تاوانانە گەورەیەی كە لە ناكاو ئارامی دەكات بەشین بەهۆی ئەوەی بە ملیۆنان مەتر لە زەوی ئەم وڵاتە بەمین چێندراوە  بەردەوام هەڕەشە لە ژیانی هەرتاكێكی ئەم گەلەداو هەڕەشە لەبوونی دەكات.

هەروەها وەك وەفادارییەك بۆ كەڵە هونەرمەندو سینەماكاری گەورەی كورد هۆڵی سینەمای مۆزەخانەكە ناودەنرێت (هۆڵی سینەمایی یەڵماز گۆنای).

  هۆزان فاتیح لەماڵپەڕی میدیا پیوكەی وەرگیراوە

بۆچوون