Naxsh Bannar Ad

جینۆساید كورد
2014/11/24 12:19
نوسەر: جینۆسایدی کورد

جێگیر كردنی جینۆسایدی كورد لە پرۆگرامی خوێندنی بەشی یاسای زانكۆی هەڵەبجە

مامۆستای زانكۆو نووسەر “ئاوارە حوسێن” لە ئاكاونتی تایبەتی خۆی لە تۆڕی كۆمەڵایەتی فەیسبوك پۆستێكی گرنگی بڵاو كردوەتەوەو باسی ئەوە دەكات پاش ماندوبونێكی زۆر توانیانە جینۆسایدی گەلی كورد لە پرۆگرامی خوێندنی هەر چوار قۆناغەكەی كۆلێژی یاسا جێگربكەن و بخوێندرێ‌، ئێمە لە ماڵپەڕی جینۆساید كورد وێڕای بەرزنرخاندنی ئەم هەنگاوە پڕ بەهاو گرنگە ئەكادیمیەو دەست خۆشی لە مامۆستا ئاوارەو هاوكارەكانی، دەقی پۆستەكە وەك خۆی بڵاو دەكەینەوە كە ئەمەی خوارەوەیە

“زۆربەی گروپە جینۆساید كراوەكانی دنیا پاش ئەوەی جۆرێك لە سەربەخۆییان بەدەستهێناو دەوڵەتی سەربەخۆیان ڕاگەیاند، جینۆسایدەكەیان لە پرۆگرامی خوێندنیان جێگیر كرد. بەڵام وا ٢٣ ساڵە خاوەنی حكومەتێكی خۆ بەڕێوەبەرو سەربەخۆییەكی دیفاكتۆین ئەو كارەمان نەكرد. كە جینۆسایدی نەتەوەكەمان وەك قوڵترین ئازار كە چێشتومانە و وەك پەیامێك بە گوێی نەوەی داهاتو و مرۆڤایەتیدا بدەین و لە پێناوی مرڤ دۆستی و مرۆڤ پەسەندیدا یادی بكەینەوەو بیخوێنین.

چەند ساڵێكە هاوار دەكەین و دەنوسین كە جینۆسایدی نەتەوەكەمان لە پرۆگرامی خوێندنی وەزارەتەكانی پەروەردەو باڵا جێگیر بكرێت نە كەس هاوارە یاساییەكەی بیستین نەكەس خوێندینیەوە. پاش ئەوەی بەشی یاسا لە زانكۆی هەڵەبجە كرایەوەو بۆ ئەمساڵی خوێندن فێرخواز وەردەگرێت، بە ئەركێكی مرۆی و قانونی و نەتەوەیم زانی ئەو بابەتە لە پرۆگرامی خوێندنی بەشەكەمان جێگیر بكەین. بە شادییەوە لە كۆبونەوەی ئەنجومەنی زانكۆی هەڵەبجە كە لە ١٥-١٠-٢٠١٤ ئەنجامدرا پرۆگرامی خوێندنی هەر چوار قۆناغی یاسا كە جینۆساید بابەتێكە لە پرۆگرامەكە پەسەند كرا. بەختەوەرم پێشنیارو داواكاریەكەم بۆ جێگیر كردنی جینۆسایدی كورد لە پرۆگرامی بەشی یاسا بە هاوكاری و هاوهەڵوێستی مامۆستایانی بەڕێزی هاوڕێم لە بەشی یاساو ئەنجومەنی زانكۆی هەڵەبجە پەسەند كرا.

ئومێد دەكەم جینۆسایدی كورد لە لە پرۆگرامی خوێندنی بەشی یاسا لە زانكۆكانی تری كوردستان جێگیر بكرێت. چونكە جینۆساید وەك سامناكترین تاوان بەردەوام دژی نەتەوەكەمان ئەنجام دەدرێت، وەك ئەوەی بڵێی چارەنوسی نەتەوە خێر لە خۆنەدیوەكەمان جینۆساید بێ”.

بۆچوون