Naxsh Bannar Ad

جینۆساید كورد
2015/05/03 17:24
نوسەر: جینۆسایدی کورد

كۆنفرانسی “icmp” تایبەت بە مافی كەس و كاری بێسەروشوێنكراوان یەكەم رۆژی كارەكانی تەواو كرد

 ئەمڕۆ 3-5-2015 لە ئوتێل دیوانی هەولێر، كۆنفرانسی ” بەرەو ستراتیژییەتی بەردەوامی پرۆسەی گەڕان بەدوای بێسەرو شوێنكراوان” یەكەم رۆژی كارەكانی تەواوكردو بڕیاریشە سبەینێ‌ درێژە بەكارەكانی بدات.

سەرەتای كردنەوەی كۆنفرانس لەلایەن خاتوو”كاترین” بەڕێوەبەری رێكخراوی “icmp” پێشكەشكرد، باسی كۆنفرانسەكەو ئامانجەكانی، هەروەها باسی ئەوەشی كرد كە لە دوای 2003 دەرفەتیان بۆ رەخساوە لە كوردستان كاربكەن و دواتریش لە هەولێر ئۆفیس بكەنەوە.

هەروەها لە ووتەكەیدا وتی: لە ماوەی رابوردوو لە عێراق تاوانەكانی جینۆسایدو دژی مرۆڤایەتی و جەنگ روویداوە، لە ئێستاشدا تاوانی جۆراو جۆر روودەدەن، بۆنموونە تاوان دژی ئێزدییەگان، هەروەها تاوانی جۆراو جۆر كە بەردەوام روودەدەن، كۆی ئەم تاوانانەش وای كردوە زیاتر لە یەك ملیۆن كەس بێسەرو شوێن بن و كەس و كارەكانیان لە دۆخێكی سەختی چاوەڕوانیدا بن و ژیانێكی سەخت بگوزەرێنن.

هەروەها وتی: پرسی بێسەرو شوێنكراوان پرسیكی هەستیارو گرنگە، رەهەندو لێكەوتەی جۆراو جۆری هەیە، گەڕان بەدوای بێسەروشوێنكراوان هەروا ئاسان نیە، بەڵام ئەمە ئەوە ناگەیەنێ‌ دەستبەرداری بین و دەبێت بەردەوام كاری لە سەربكەین، بە تایبەت پرسی ناساندن و هەڵدانەوەی گۆڕە بە كۆمەڵەكان و لێكۆڵینەوەو  كاركردن لە سەریان.

ئەوەشی وت:Icmp  بۆ ماوەی 12 ساڵە لە سەرئاستی نێودەوڵەتی كار لەسەر ئەم پرسە دەكات و بەردەوام دەبێت لە كارو چالاكییەكانی خۆی بۆ تەحقیق كردنی ئامانجەكانی، زۆر گرنگە ئیش و كارەكان بخرێتە چوار چێوەی یاسایی و رێك بخرێت، بۆ ئەوەی كەس و كاری بێسەروشوێنكراوان كەمترین كێشەو گرفتیان هەبێت و خانەوادەكانیان ئارام بژین یان بڕێك ئارام ببنەوە.

پاشان سۆران عومەر سەرۆكی لیژنەی مافی مرۆڤ لە پەرلەمانی كوردستان، ووتەیەكی پێكەش كردو باسی ئەوەی كرد، كە پرسی جینۆساید، لایەنی مرۆیی و نیشتمانی هەیە، وتیشی: جێگای دڵخۆشیە، ئەمرۆ ئەم رێكخراوە “icmp” كە رێكخراوێكی قبوڵكراوە، هاتوونەتە كوردستان و هاوكاری لایەنێكی گرنگی بایەخی ئێمە بە پرسی جینۆساید دەكەن,

هەروەها وتیشی: تاوانەكانی داعش هەموو كۆمەڵگای نێودەوڵەتی تووشی شۆك گرد كە دژ بە “ئێزدی، كاكەی، شەبەك، توركمان، مەسیحی، كریستیان” ئەنجامیاندا. وتیشی: ئەم تاوانە بە دەست هێزێكی بەربەری كە هیچ پەیوەندییەكی بە ئیسلامەوە نیە ئەنجامدراوە.

پاشان و بە پێی خشتەو كارنامەی كۆنفرانسەكە هەریەك لە نووسەرو چالاكوان “عەدالەت عومەر ساڵەح” و سەرۆكی لیژنەی یاسایی پەرلەمانی كوردستان “ڤالافەرید” و “پەری خان” بەرێوەبەری گشتی لە وەزارەتی شەهیدان و ئەنفلكراوان، لێكۆڵینەوەكانیان تایبەت بە بێسەرو شوێنكراوان و مافەكانیان و رێكخستنیان بە پێی یاساو رێكارە نێو نێودەوڵەتیەكان پێشكەش كرد.

لە بەرامبەریشدا لەلایەن ئامادەبوانەوە، گفتوگۆی گەرم و جدی لێكۆڵینەوەو بابەتە پێشكەش كراوەكان كرا، چەندین سەرنج و پێشنیارو بیرۆكە خرانە ڕوو.

ئەمەو رۆژی یەكەمی كۆنفرانسەكە بە سەركەوتوویی كۆتایی پێهات و بڕیارە سبەینێ‌ درێژە بەكارەكانی كۆنفرانس بدرێت.

بۆچوون