Naxsh Bannar Ad

جینۆساید كورد
2015/10/07 13:11
نوسەر: جینۆسایدی کورد

راسپاردەكانی كۆنفرانسی جینۆسایدو ئەنفال گەیەنراویە سەرۆكایەتی پەرلەمانی كوردستان

سەرلەبەیانی ئەمڕۆ 7-10-2015 شاندێك لە ئەندامانی یەكەمین كۆنفرانسی تایبەت بە جینۆسایدو ئەنفال لە گەرمیان، بە مەبەستی گەیاندنی راسپاردەكانی كۆنفرانس سەردانی پەرلەمانی كوردستانیان كرد.

سەرەتا كاتژمێری 11ی پێش نیوەڕۆ، شاندەكە سەردانی ئەو پەرلەمانتارانەیان كرد كە لەهۆڵی پەناگیری مانیان گرتوەو داوای بەپیرەوە چوونی داخوازییەكانی چین و توێژەكانی خەڵك بەگشتی و فەرمانبەران بەتایبەتی دەكەن و هاوكات داوای چارەسەركردنی پرسە یاسایی و هەستیارەكان و وەلاوە نانی ململانێ‌ لاوەكیەكان دەكەن، لەبەرامبەریشدا لەلایەن جێگری سەرۆكی پەرلەمانی “جەعفەر ئیمینكی”و سكرتێری پەرلەمان “فەخرەدین قادر”و نوێنەری زۆربەی فراكسیۆنەكانی پەرلەمانەوە پێشوازی گەرم كران.

پاشان تەها سلێمان بەڕێوەبەری دەزگای لێكۆڵینەوە بۆ جینۆسایدو ئەنفال، كورتەیەكی پوختی لەبارەی یەكەمین كۆنفرانسی تایبەت بە جینۆسایدو ئەنفال لەگەرمیان پێًشكەش كردو راسپاردەكانی پێشكەش بە جێگری سەرۆكی پەرلەمان و سكرتێری پەرلەمان و لیژنەی كاروباری شەهیدو ئەنفال و پێشمەرگەو لیژنەی مافی مرۆڤ و لیژنەی كۆمەڵی مەدەنی كرد.

لەبەرامبەریشدا جێگری سەرۆكی پەرلەمانی كوردستان وتەیەكی پێشكەش كردو پیشتوانی بۆ راسپاردەكانی كۆنفرانس و بەدواداچوون بۆ جێبەجێكردنیان دووپات كردەوە، هەروەك سالار مەحمود سەرۆكی لیژنەی كۆمەڵی مەدەنیش سوپاس و پێزانینی پەرلەمانتارانی مانگرتووی گەیاندە ئەندامانی شاندەكەو تەئكیدی كردەوە كە لای خۆیانەوە هەموو پشتیوانیەكی دووپات كردەوە بۆ راسپاردەكانی كۆنفرانس.

پاشان كاتژمێری 12 شاندی یەكەمین كۆنفرانسی تایبەت بە جینۆسایدو ئەنفال سەردانی سەرۆكی پەرلەمانی كوردستانیان كرد، دكتۆر یوسف مەحمەد سەرۆكی پەرلەمانی كوردستان بە گەرمی بەخێرهاتنی میوانەكانی شاندەكەی كرد، لەبەرامبەریشدا تەها سلێمان بەناوی شاندەكەوە سوپاسی سەرۆكی پەرلەمان و دەستەی سەرۆكایەتی پەرلەمانی كرد، بۆ هەموو هاوكاری و پشتیوانیەكانیان لە پێناو سەرخستنی كۆنفرانسەكە.

سەرۆكی پەرلەمانیش كۆنفرانسەكەی بە گرنگ و ئەرێنی وەسف كردو پشتیوانی خۆیانی بۆ دووپات كردەوە، وتیشی: بە هەموو توانایەكمان بەدواداچوون بۆ راسپاردەكانی كۆنفرانس دەكەین و كاری لەسەر دەكەین.

هەر لەو سەردانەدا لەكاتی ئامادەبوونی وەزیری دارایی لە پەرلەمان، شاندەكە لە گەڵ وەزیری دارایی رێباز حەملان، بە ئامادەبوونی سۆرن عومەر سەرۆكی لیژنەی مافی مرۆڤی پەرلەمان كۆبونەوەو جگە لە پێشكەش كردنی راسپاردەكان كێشەی زیندانیانی ئەنفالیان خستەبەردەمی وەزیری دارایی، كە یەكێك بوو لە راسپاردەكانی كۆنفرانس، ئەویش بەڵێی ئەوەیدا بەدواداچوون بۆ پرسەكە بكات و رێگا چارەی گونجاوی بۆ بدۆزێتەوە.

دوا وێستگەی سەردانی شاندەكەی كۆنفرانسی تایبەت بە جینۆسایدو ئەنفال لە گەرمیان، سەردانی دكتۆر بورهان یاسین بەرێوەبەری سەنتەری توێژینەوەی پەرلەمان بوو، بە مەبەستی پێشكەش كردنی راسپاردەكان و گەیاندنی پێزانین لەبەرامبەر هاوكارییان بۆ سەرخستنی كۆنفرانسەكە، هەروەك دكتۆر بورهان دوای بەخێرهاتن پشتیوانی سەنتەری بۆ دەزگای لێكۆڵینەوە بۆ جینۆسایدو ئەنفال و كۆنفرانسەكەو راسپاردەكانی دووپات كردەوە.

DSC_0023 DSC_0031 DSC_0040 DSC_0093 DSC_0114 DSC_0121 DSC_0138

بۆچوون