Naxsh Bannar Ad

جینۆساید كورد
2015/12/09 16:40
نوسەر: جینۆسایدی کورد

ئاوارە حوسێن، كتێبێكی نوێ‌ لەبواری جینۆساید چاپ دەكات

لە واڵای تایبەتی خۆی لە تۆڕی كۆمەڵایەتی فەیسبوك نووسەرو مامۆستای زانكۆی هەڵەبجە، لە پۆستێكدا نوسیویەتی: بە بۆنەی (٦٧) مین ساڵیادی پێكهێنانی (ڕێككەوتننامەی قەدەغەكردنی جینۆساید و سزا خستنە سەر تاوانكارانی و جاڕنامەی جیهانی مافەكانی مرۆڤ) وە مژدەی نوێترین كتێبم دەدەم (جینۆسایدی كورد لە ڕوانگەی یاسای نێودەوڵەتیەوە). تەواوی كتێبەكە (١٥٧،٠٠٠) وشەیە.
هەروەها دەشنوسێ‌: كتێبەكە ئامادەیە بۆ چاپ و تا ئەو كاتەی چاپ دەكرێت، هەوڵ دەدەم بەم زوانە بەش بەش لەم لاپەڕە تایبەتەی خۆمەوە بڵاوی بكەمەوە بۆ ئەوەی هەموان لێی سودمەند بن.
لەو كتێبەدا دواین پەیامی یاسایی و هەموو هزر و هێزی یاسایی خۆمم تا ساتی نوسینی كتێبەكە تێدا خستووەتە گەڕ.
ئەوەشی نوسیوە: سەدان سەرچاوەی یاساییم تێدا بەكارهێناوە و نزیكەی (٥٠٠) ماددەی یاسای نێودەوڵەتیم تێدا شرۆڤە و شیكردووەتەوە و سەلماندوومە ئەو تاوانانەی كە لە دژی نەتەوەی كورد ئەنجام دراون لە هەرچوار بەشی كوردستانی داگیركراو دابەشكراودا تاوانی جینۆساید پێك دەهێنێت. ئەو كەیسەش ئەو مافە یاساییە بە نەتەوەكەمان ڕەوا دەبینێت كە وەك كارتێكی یاسایی بەهێز بۆ ڕاگەیاندنی سەربەخۆیی كوردستان سودی لێوەرگرێت.
ئێمە لە ماڵپەڕی جینۆساید كورد، پیرۆزبایی گەرم و دەست خۆشی لە هاوڕێ‌ و هاوكاری بەردەواممان مامۆستا ئاوارە دەكەین، بەهیوای ئەوەی لە نزیكترین دەرفەتا كتێبەكە چاپ بێت و ببێتە یەكێك لە سەرچاوە باشەكانی تر لە بواری ناساندنی جینۆسایدو ئەنفالی گەلەكەمان.

بۆچوون