Naxsh Bannar Ad

جینۆساید كورد
2016/05/06 9:25
نوسەر: جینۆسایدی کورد

ئه‌نفالی چوار، خه‌مێكی مرۆیی

له‌تیف فاتیح فه‌ره‌ج
ئه‌وه‌ی له‌ ئه‌نفالی چواردا له‌ هه‌موو ڕوداوه‌كانی دیكه‌ زیاتر ئازاری دام ، له‌ ئه‌نفالی جه‌له‌مۆردا ، ئه‌نفالكردنی ئه‌و خوشك و برا ده‌رون نادروستانه‌ بوو ، كه‌ ڕه‌نگه‌ هه‌رگیز نه‌یانزانیبێ‌ ئه‌نفال چیه‌و بۆ ده‌بێ‌ ئه‌وان ئه‌نفال بكرێن ، ئاخر ئه‌وانێك كه‌ جگه‌ له‌ جه‌له‌مۆرد هیچ كوێی ئه‌م دنیا به‌رینه‌یان نه‌بینیبوو، بۆ كوشتن و له‌ ناودانیان سه‌دان كیلۆ مه‌تر له‌ جه‌له‌ مۆرد دورخرانه‌وه‌ ، ئه‌وان بۆ مردن بران بۆ ئه‌و شوێنه‌ دوره‌ نه‌ك بۆ ئه‌وه‌ی دنیا ببینن، دنیایه‌ك كه‌ دوای ئه‌وانیش و هه‌تا ئێستاش بۆنی ئه‌نفالی لێدێت ، هه‌تا ئێستاش خوێن له‌ برینی ئازاری ئه‌نفالزه‌ده‌كان ده‌چۆڕێت و سته‌مكاریش هه‌ر ڕۆژله‌ به‌رگێكا خۆی ده‌نوێنێ‌ ، رۆژێك له‌ به‌رگی عه‌ره‌بیداو رۆژێك له‌ به‌رگی عوسمانیداو رۆژێك له‌ به‌رگی كوردیدا ، هه‌تا ئێستاش ئێمه‌ ئه‌وانه‌ی كه‌ماوین به‌ شێوه‌یه‌كی تر له‌به‌رده‌م هه‌ڕه‌شه‌ی ئه‌نفالداین ، نابێ‌ داوای مافی خۆمان بكه‌ین ، نابێ‌ داوای ئازادیه‌ك بكه‌ین ، جیاوازی هه‌بێت له‌ گه‌ڵ پێناسه‌ی سوڵتانا بۆ ئازادی ، ئه‌وان سه‌ره‌ڕای ئه‌وه‌ی به‌ ساده‌ی خۆیان وێنه‌كانیان شیده‌كرده‌وه‌و له‌ سوره‌تی ئه‌نفالدا كزو مه‌لول بوون، به‌ڵام بۆ مردن بران بۆ شوێنێكی تر ، ئێستا دوای 28 ساڵ له‌ ئه‌نفال كه‌س نازانێ‌ ئه‌وان له‌كام گۆڕی به‌ كۆمه‌ڵی كوردان ، ئاخۆ هێشتا لایان وایه‌ بۆ ئه‌وه‌ براون كه‌ دنیا ببینن، یان بۆ مردنی هه‌تاهه‌تایی .
سه‌یركردنی سیمای پڕ له‌ به‌رائه‌ت و پاكی ئه‌وان زۆر جار من لول و گێژی هه‌زار خه‌یاڵ و ئه‌ندێشه‌ ده‌كات، خودا چۆن ڕێیدا ئه‌و تاوانه‌ به‌ ناوی په‌یامێكی ئه‌وه‌وه‌ بكرێ‌ ، ما هاواری خودا برین ساڕێژو ئازار شكێن نیه‌ ، تۆ بڵێیت ئه‌وه‌ی به‌سه‌ر سه‌دام و دارو ده‌سته‌كه‌ی هات توڕه‌یی دره‌نگوه‌ختی خودا نه‌بێ‌ له‌ تۆڵه‌ی ئه‌واندا ، بۆ نا كوا كه‌ی سته‌مكاری له‌ مێژودا به‌رده‌وامی هه‌بووه‌ ، سه‌رزه‌مین پڕه‌ له‌ گۆڕی سته‌مكاران، به‌ڵام خۆ ئه‌وه‌ به‌س نیه‌ ، ئایه‌ تاكه‌ی ده‌بێ‌ مێژوله‌ هه‌ناویدا په‌ره‌ به‌ سته‌مكاری بدات و كه‌ی مرۆڤه‌كان ده‌توانن به‌ ئارامی و ئاسوده‌ی سه‌ر بخه‌نه‌ سه‌ر سه‌رین ، بێئه‌وه‌ی ترسی ئه‌وه‌یان هه‌بێت سبه‌ی چی ڕووده‌دات .
كه‌ له‌ سیمای ئه‌و قوربانیانه‌ ڕاده‌مێنم ، سه‌ره‌ڕای ئازاره‌ قورسه‌كه‌ی ناخم ، كه‌چی به‌ خۆم نیه‌ له‌ ناوه‌وه‌ به‌ هه‌موو تینی خۆم به‌ ئاوه‌زی سته‌مكاری پێده‌كه‌نم ، سته‌مكاری له‌و په‌ڕی به‌ هێزیدا له‌ ده‌رون نادروست و مناڵیش ده‌ترسێ‌ ، ئه‌وانله‌و قوربانیانه‌ش ده‌ترسن كه‌ به‌ ناهه‌ق ده‌یانكوژن .
ئه‌وان له‌ هه‌موو شت ده‌ترسن ، سته‌مكار ترسنۆكترینی كه‌سه‌كانی سه‌ر ئه‌م زه‌ویه‌ن بۆیه‌ سالم له‌ وه‌ڵامی نالیدا چه‌ند جوان ده‌نووسێ‌ :
زستانی ئه‌وه‌ڵین بوو دڕا به‌رگی “شێخه‌باس “
رۆمی ئه‌وه‌نده‌ شوومه‌ له‌ شه‌خسیش ده‌خا زه‌ره‌ر
ئاخر سته‌مكار له‌ دارو دره‌خت و شه‌خس و چه‌م و كانیش ده‌ترسن .
ئه‌وه‌بۆیه‌ ئێوه‌شیان له‌ دورترین شوێنه‌ زای خۆتان كرده‌ ژێر گڵه‌وه‌ چوون لێتان ده‌ترسان ، وای ئێوه‌ چه‌ند گه‌وره‌ن كه‌ سته‌مكارو سته‌مكاری له‌ به‌رتا ن له‌رزیوه‌ ، وای ئێمه‌ چه‌ند بچوكین كه‌ له‌به‌رده‌م سته‌مكارو سته‌مكاریدا بێده‌نگین .

بۆچوون