Naxsh Bannar Ad

جینۆساید كورد
2017/05/17 17:03
نوسەر: جینۆساید كورد

كۆمەڵكوژیی ئێزیدییەكان لە مێژوودا “هۆكار و دەرەنجامەكانی”

كۆمەڵكوژیی ئێزیدییەكان لە مێژوودا
“هۆكار و دەرەنجامەكانی”
پ.ی.د.سەروەر عەبدولڕەحمان عومەر
پێشەكی
ساڵەهایە كورد وەك نەتەوەیەكی بێ دەوڵەت، لەلایەن داگیركەرانەوە خاكەكەی داگیركراوەو خەلكەكەی چەوساوەتەوەو لە گەلێ‌ كاتیشدا بەشێوەیەكی نامرۆڤانە كۆمەڵكوژكراوە. ئەگەر ئاوڕێكی رابردوو بدەینەوە هەر لەسەردەمی ئاشوریەكانەوە كە سیاسەتی كۆمەڵكوژییان بەرامبەر میدییەكان پەیڕەو كردووە، ئەم سیاسەتە بەردەوام بووە تا هاتنی لەشكری عەرەبیی ئیسلامی و عوسمانیەكان و سەفەویەكان و دواتریش دەوڵەتە تازە دامەزراوەكانی عیراق و ئیران و توركیاو سوریا هەر درێژەی هەبووە.
ئەوەی لەم توێژینەوەیەدا جەختی لەسەر كراوەتەوە كۆمەڵكوژیی ئێزیدییەكانە، كە وەك پێكهاتەیەكی ئایینی تایبەتی سەر بە نەتەوەی كورد، جیا لەهەموو پێكهاتەكانی تر، بەدرێژایی مێژوو زۆرترین چەوسانەوەیان لەسەر بووەو بەردەوام سەركوتكراون و ناوچەكەیان تاڵان كراوەو رەز و باخ و بێستانیان سوتێنراوەو شار و دێهاتەكانیان وێران كراوەو خەڵكەكەی كۆمەڵكوژ كراوەو ژن و منداڵەكانیان بەدیل براون و لەبازاڕەكاندا كڕین و فرۆشتنیان پێوە كراوە، تازەترین تاوانیش كە دەرهەقیان ئەنجامدرابێت كۆمەڵكوژیی ئەم دواییەی ئێزیدییانی شەنگال بوو لەسەر دەستی گروپی تیرۆریستیی داعش.
جگە لە داگیركەرانی بێگانە، هەندێك جار لەلایەن میرە كوردەكانیشەوە بەناوی ئایینەوە هێرشكراوەتە سەریان و پەلامار دراون. هەر چەند ساڵ جارێك ئەم مێژووەیان دووبارە بۆتەوە، تا ئێستا حەفتاو چوار فەرمانی لەنێوبردنیان دەرچووە، بەلام ئێزیدیانی سەركەش خۆیان راگرتووە، تاكە گوناهیشیان ئەوە بووە كە ویستوویانە ئازادیی بیروباوەڕی خۆیان بپارێزن و هەست بە مرۆڤایەتی خۆیان بكەن و سەربەرزانە بژین. سەرباری كۆمەلكوژییان و خەمساردی سەرۆك و رێبەرانی كورد لە ئاستی پرسەكەیان، ئەوان هەر خۆڕاگر بوون و هەر بەكوردی و بە ئێزیدیتی ماونەتەوە. ئەوەی جێگەی تێڕامانە سەرباری ئەم هەموو تاوانەی دەرهەق بەم پێكهاتە نەتەوەیی و ئایینیە كراوە، بەلام نە لە ئاستی ناوخۆ و نە لە ئاستی دەرەوە، بۆ ناساندنی دۆزە رەواكەیان وەك پێویست كار لەسەر ئەم دۆسیەیە نەكراوە.
ئەوەی بەسەر ئێزیدییەكاندا هاتووە لە مێژوودا كەم وێنەیە، كە چەند هۆكارێكی سیاسی و ئابوری و ئایینی و كۆمەلایەتی لەپشت ئەم هەڵمەت و رەشەكوژییانەوە بوون، ئەم توێژینەوەیە جگە لە پێشەكی، تیایدا باس لە رەچەلەك و باوەڕی ئێزیدییەكان، شوێنی دانیشتنیان، هەڵمەتەكانی كۆمەڵكوژیی دژ بە ئێزیدییەكان، هۆكارەكانی كۆمەڵكوژییەكان و لەكۆتاییشدا دەرەنجامەكانیمان خستۆتە روو.
بۆ نوسینەوەی توێژینەوەكە سود لە دەیان سەرچاوەی كۆن و نوێ، خۆماڵی و بیانی وەرگیراوە. هەوڵمانداوە بە میتۆدێكی زانستیی مێژوویی بەراوردكاریی لە قۆناغە جیاجیاكانی كۆمەڵكوژیی ئێزیدییەكان بدوێین كە جگە لە جیاوازی تەكنیكی شەڕ و بەدرێژایی ئەو مێژووە بەیەك ریتم دەسەلاتداران دژ بەم پێكهاتەیە پەیڕەویان كردووە

بۆ خوێندنەوەی تەواوی لێكۆڵینەوەكە ئەم لینكە كلیك بكە كۆمەڵكوژیی ئێزیدییەكان لە مێژوودا

بۆچوون