Naxsh Bannar Ad

جینۆساید كورد
2017/05/19 19:06
نوسەر: جینۆساید كورد

نامەكەی عاسی و وەڵامەكەی بەعس!

نامەكەی عاسی و وەڵامەكەی بەعس!
لەتیف فاتیح فەرەج
عاسی ئەحمەد مستەفا هاوڵاتیەكی گەرمیانی خەڵكی گوندی زینانەبوو، ئەو پاش ئەوەی بۆ سەربازی خانەوادەكەی بە جێدەهێڵێ‌ و دەچێ‌ داكۆكی لە بەعس بكات، بە دیلی دەستی سوپای ئێران دەكەوێت كە دەگەڕێتەوە هەواری خاڵی دەبینێ‌ بۆ سۆراخ نامەیەك بۆ دیوانی سەرۆكایەتی بەعس و خودی سەدام دەنێرێ‌، بە نوسراوی ژمارە 16565 لە رۆژی 29ی تشرینی یەكەمی 1990 بەم جۆرە وەڵامی دەدەنەوە ” بەڕێز عاسی مستەفا ئەحمەد خێزانەكەت و مناڵەكانت لە شاڵاوەكانی ئەنفالدا تیاچوون، كە ناوچەی باكوری گرتەوە لە ساڵی 1988″ من تا ئێستا چەندین جار لەسەر ئەو نامەو وەڵامە هەڵوەستەم كردووە، لێ‌ هەست دەكەم هێشتا وەك پێویست لەسەری نەوەستاوم.
عاسی پێش ئەوەی ببێتە سەرباز هاوكارێكی باشی پێشمەرگە دەبێت وەك ئەوەی كە مەحمود سەنگاوی لە یاداشتەكانی خۆیدا باسی دەكات، ئەو تا 1987 هاوكاری هێزی پێشمەرگە دەكات، كاتێ‌ بۆنی ئەنفال و سڕینەوە سەرەتاكانی هەستی پێدەكرێت، عاسی بۆ ئەوەی خۆی و مناڵەكانی لەو بۆنە بپارێزێ‌ دەچێتە سەربازی، بەڵام هەموو چیرۆكەكە ئاوەژوودەبێتەوەو عاسی نەك مناڵەكانی تەنانەت خۆیشی بۆ ناپارێزرێ‌، ئەو دیلی ئێرانە كە حكومەتەكەی خۆی، ئەو حكومەتەی عاسی سەربازی بۆ كردووەو لە پێناویدا دیلكراوە، هاوسەرو مناڵەكانی دەبەن و دەیكەنە ژێر خۆڵەوە، لە وەڵامی نامەكەشیدا دەنووسن ” هاوسەرو مناڵەكانت لە شاڵاوەكانی ئەنفالدا تیاچوون “.
ئەم خەمساردیە بەرانبەر نامەی سەربازێكی خۆت، سەربازێك كە هەرگیز ئەگەری هاتنەوەی نەبووە، لە جەنگێك كە وەك گەڵای دار مرۆڤەكان لە ناویدا هەڵدەوەرین، پێمان دەڵێت بەعس چ مەخلوقێكی ترسناكە، چ مەخلوقێكی گوێ‌ نەدەرە بە بوونی مرۆڤ ، كوشتنی ژن و مناڵی سەربازێكی خۆت، سەرازێك كە لە پێناوی تۆدا جەنگاوەو دەست دوژمن كەوتوە، تەواوی مێژوی عێراق دەخاتە ژێر پرسیارەوە، چۆن دەكرێت كچ و كوڕو هاوسەری سەربازێك كە جارێ‌ دیار نیە ماوە یان دیلە بەو جۆرە بێت لە سایەی حكومەتێكا كە هەرگیز لە ئازاری ئەو گوندنشینانەی كوردستان تێنەگەیشت، كوشتنی هاوسەرو مناڵەكانی عاسی بەو جۆرە لە كاتێكا ئەو لە شەڕدایە بۆ ئەوەی ئەو دەسەڵاتە بپارێزێ‌ هیچ ئاوەزێك بۆی هەزم ناكرێت.
ئەو جۆرە لە كوشتن چ دەرهەق تەواوی خەڵكی بێچەكی كوردستان، چ دەرهەق بە مناڵ و هاوسەری عاسی ، ئێمە دەخاتە بەردەم دادگای كردنی تەواوی مێژوی ئەم وڵاتە لەسەر ستەمبنیاتنراوە.
ئێستا با بپرسین ئایە شوناس و ناسنامەی هاوسەرو مناڵەكانی عاسی چین؟ چۆن دەكرێ‌ عاسی سەربازی عێراقی بێت و مناڵەكانی هەمان ناسنامەیان نەبێت؟ گەر خاوەنی هەمان ناسنامەی عاسین بۆچی زیندە چاڵكران؟ بۆچی نەیانتوانی داكۆكی لە خۆیان بكەن؟ راستی ئەوە عاسیە هەمان شوناسی مناڵەكانی هەیە نەك بە پێچەوانەوە؟ مناڵەكانی عاسیش وەك باوكیان ئەو زمانە نازانن كە هەڵیكوتاوەتە سەر زینانەو خانەوادەكانی بەرەو چاڵەكانی مردن بردووە؟ ئەوان نەیانتوانیوە بەو هێزە بڵێن ئێمە باوكمان سەربازە؟ گریمان ئەوەشیان ووت؟ ئەو هێزە كە عەلی حەسەن مەجید پێی ووتوون وەكو بزن سەریان بڕن، چ باكیان بەوەیە عاسی سەربازە یان نا؟!
لێرەوە دەردەكەوێت كورد بەو دەوڵەتە تەنێكی نامۆو بێزراوە، هەڵبەت ئەگەر كورد نامۆو بێزراو نەبوایە، نەدەبوو هاوسەرو مناڵەكانی عاسی بەو دەردەچن؟ وەك چۆن نەدەبوو دیوانی سەرۆكایەتی كۆماری عێراق بەو خوێن ساردیە وەڵامی سەربازێكی دیلی خۆی بداتەوە، سەبارەت بە لە دەست چوونی هاوسەرو مناڵەكانی.
دانپیانانی بە عس بەوەی هاوسەرو مناڵەكانی سەربازێكی دیلی خۆی زیندە چاڵكردووە، دانپیانانەكەش دەگەڕێتەوە بۆ ساڵی 1990، سەركردایەتی كورد لە باشوری كوردستان دەخاتە ژێر پرسیارەوە، ئاخر چۆن دەبێت، دوای ئەو دانپیانانە، دوای ناردنی ئەو نامەیە بۆ عاسی هێشتا سەرانی كورد چاوەڕێی ئەوە بن سەدام و بەعس لە تەكیاندا رێك بكەوێت؟ ئەگەر لە هەندێ‌ باری دیكەدا نەرمی كورد وەك لێبوردەیی بخوێنرێتەوە، لەمەدا هیچ بیانوویەك نیە بۆ لێبوردەیی، نامەكە بە ڕوونی دەنووسێ‌ هاوسەرو مناڵەكانت لە كردەی ئەنفالدا تیاچوون؟
واتە وەك خائین مامەڵەیان لە تەكا كراوە، تەواوی بڕیارو ڕاسپاردەكانی ئەو سەردەمەی بەعس وەك خائین، بە كرێگیراوی ئێرانی، یاخی سەیری ئەو خەڵكەیان كردووە، تەنانەت كاتی لە 6-9-1988 لێبوردنی گشتیش بڵاو دەكرێتەوە، هێشتا جەلال تاڵەبانی تیا نیە، دەنووسرێ‌ ئەم لێبوردنە جەلال تاڵەبانی خائین ناگرێتەوە، بەڵام تەواوی ئەوانی تر دەگرێتەوە، هەڵبەت لە دیدی بەعسا ئەوانی تریش خائینن، بەڵام بەر ئەو لێخۆشبوونە كەوتون، ئەمە پاش چی، پاش ئەوەی لە هەڵەبجەو ئەنفالدا هەزاران كەس بوونە قوربانی و سەدان گۆڕی بە كۆمەڵ لە خەڵكی سڤیلی كورد پڕكرا.
ئەوساش هێشتا بەعس دێت لەوان خۆش دەبێت، ئەو لێخۆشبوونە نابێتە هۆی هاتنەوەی هاوسەرو مناڵی عاسی، لەبەر ئەوەی ئەوان بەر لە لێبوردنەكە بوونە بە خۆراكی گۆڕی بە كۆمەڵ، سێ‌ ساڵ دواتر سەرانی كورد بە هەڵەداوان دەچنەوە ئامێزی بە غدا، ئەوان دەچن داوای رێكەوتن لە بەغدا دەكەن. نەعاسی هەرگیز برینەكەی ساڕێژ دەبێت، نە ئەو نامەیەش بە ئاسانی لە بیر دەچێتەوە، ئەو نامەیەی دیوانی سەرۆكایەتی بۆ عاسیان ناردووە، كوشتن بەو جۆرەو تا ئێستاش هەڵوەستە نەكردنی پێویست لە سەر دادگایی كردنی ئەو ئاوەزو بیر كردنەوەیە، هەمیشە ئەگەری ڕوداوەنەی لێدەكرێت.
بۆ من جێی خەمێكی قوڵە كە تا ئێستاو دەیان ساڵ ” سێ‌ دەیە ” دوای ئەو نامەیە، تا ئێستا وەك پێویست هیچ رۆشنبیرێكی عەرەبم نەبینی لەسەر ئەو نامەیە هەڵوەستە بكات؟ هەڵوەستە بەمانای ئەوەی چۆن دەبێت قوربانی بەو جۆرە سزا بدرێ‌؟ تۆ بڕوانە لەو ستەمكاریە بێوێنەیە، هاوسەور مناڵەكانی عاسی لە سەر كوردبوون ئەنفال دەكرێن، دەنگ و هاواریشیان بە كەس ناگات تا بڵێن باوكی ئێمە سەربازی دیلە، عاسی خۆی دیلە، كە دێتەوە كەسی نەماوە، سەرگەردان نامەیەك بۆ ئەوانە دەنووسێ‌ كە ئەو شەڕی بۆ مانەوەیان دەكرد، ئەوانیش دەڵێن، هاوسەرو مناڵەكانت لە ئەنفالدا تیاچون!!
عاسی قوربانی چەند بارەیە، دیلی ئێران، خانەوادەكەی كوژراوی دەستی عێراق، تەنیاو پەشێو، دەنگی بە كەس ناگات لەم سەر زەمینە، ئایە ئەمە هی ئەوە نیە نەفرەت لەو دیرۆكە بكرێت، هی ئەوەنیە رۆشنبیرانی عەرەب دەنگی ناڕەزایی بەرانبەر ئەو ستەمكاریە بەرزكەنەوە، ستەمكاریەك كە دەبوو پارلەمانی دوای روخانی بەعس لە عێراق دەیان دانیشتنی لە سەر كردباو ئەو مێژوەتاریكەی بە تەواوەتی پێچابایەوە، كە ئەمە ناكرێت ، هەق نیە بپرسین ئێمە لە چ دۆزەخێكداین.

بۆچوون