Naxsh Bannar Ad

جینۆساید كورد
2017/05/26 10:39
نوسەر: جینۆساید كورد

نادیە موراد پەیامێك ئاراستەی حەشدی شەعبی دەكات

نادیە موراد پەیامێك ئاراستەی حەشدی شەعبی دەكات

4

بەبۆنەی رزگاركردن و كۆنترۆڵكردنەوەی گوندی كۆچۆی ئێزدی نشینی سەربە قەزای شنگال ، نادیە موراد یەكێك لە دەربازبوانی چنگی رەشی داعش و باڵیۆزی نیازپاكی لە نەتەوە یەكگرتووەكان نامە پەیامێك ئاراستەی حەشدی شەعبی دەكات و، هاوكات هۆشداریدا لە مەترسی دابەشبوونی ناوچەكە.
نادیە موراد، باڵیۆزی نیازپاكی رێكخراوی نەتەوە یەكگرتووەكان لەپەیامەكەیدا دەڵێت “تاوەكو ئەمڕۆ گەلی ئێزدی لەبەرچاوی جیهان رووبەڕووی كۆمەڵكوژی دەبێتەوە، ماوەی 3 ساڵ لەسەر یەك داوامان لە كۆمەڵگەی نێودەوڵەتی كردووە دۆسیەی كۆمەڵكوژی ئێزدییەكان بەجیدی وەربگرێت و مافی بنەڕەتی كۆمەڵكوژیان پێببەخشێت”.

نادیە موراد هەروەها لە پەیامەكەیدا پێیوایە “ناوچە كۆنترۆڵكراوەكانی شنگال و دەشتی نەینەوا، بوونەتە گۆڕەپانی ململانێی سیاسی و سەربازی و مافی رادەربڕین بە ئێزدییەكان نەدراوە، بۆیە دەترسم ئەو ململانێیانە ببنە هۆی دابەشبوونی شنگال بۆ سێ ناوچە یان زیاتر و ململانێكانیش لە پێناو دەستگرتن بەسەر خاك بێت نەك كەرامەتی گەلەكەم، بۆیە داوا دەكەین ناوچەكانمان كۆنترۆڵبكرێنەوە، پارێزی نێودەوڵەتیمان بۆ دابین بكرێت، دادپەروەری بچەسپێندرێت، سەرجەم تاوانبارانیش بدرێنە دادگا”.
لەبارەی گۆڕە بەكۆمەڵەكانیشەوە باڵیۆزی نیازپاكی نەتەوە یەكگرتووەكان گوتی “كۆچۆ پڕە لە گۆڕی بەكۆمەڵ، تائێستاش 40 گۆڕ لەناوچەكانی شنگال و كۆچۆ دۆزراونەتەوە، دەترسم گۆڕێكی بەكۆمەڵی دیكە بدۆزرێتەوە روفاتی 6 براكەم و 700 كەسی دیكەی كۆچۆی تێدابێت”.
نادیە موراد گوتیشی “گوندەكەم ماوەی 12 رۆژ لەلایەن داعش گەمارۆدرا، داوامان لە كۆمەڵگەی نێودەوڵەتی كرد بەهانامانەوە بێن سودی نەبوو، تاوەكو تاوانی كۆمەڵكوژیان لەدژ ئەنجامدرا، داواش لەو هێزە ئەمنییەكان دەكەم پارێزگاری لە بەڵگەكان بكەن و بیانپارێزن”.
رۆژی پێنجشەممە 25-5-2017 گوندی كۆچۆ لە سنووری شنگال لەلایەن حەشدی شەعبی كۆنترۆڵكرایەوە. بەپێی راگەیێندراوێكی حەشدی شەعبی، هێزەكانی لیوای 3ی حەشد گوندی كۆچۆ-یان لە رۆژهەڵاتی بەعاج لە رۆژئاوای موسڵ كۆنترۆڵكردووەتەوە.
شایانی وەبیر هێنانەوەیە، ئامارو ژێدەرەكان ئاوا باسی كۆمەڵكوژی گوندی كۆچۆ دەكەن:
1- ژمارەمانی خانوەكانی كۆچۆ پێش داگیركردن و كاولكردن “197 ” سەدو نەوت و حەوت خانوو بوەو “244” خێزانی تێدا ژایاوە، كە ژمارەیان “1738” كەس بوە بە ژن و مناڵ و پیرو پیاو گەنج.
2- ژمارەی شەهیدو قوربانیەكانی كۆمەڵكوژی كۆچۆ كە لە 15-8-2014 لەلایەن دەوڵەتی تیرۆریستی ئیسلامی داعشەوە كراوەتە سەریان ” 492 ” كەسن لە ژن و مناڵ و پیاوو گەنج، كۆی رووفاتی شەهیدو قوربانیەكانیش لە گۆڕە بە كۆمەڵەكانی سۆلاغ و ناو گووندی كۆجۆن.
3- لە كۆی دانیشتوانی گووندەكە، “754” كەس لە ژن و مناڵ و پیرو گەنج رفێنراون، “128” ئافرەت خاوەن مێردو “94” كچ و “128” مناڵی كوڕو “84” مناڵی كچ و “37” پیاو لەكۆی سەرجەم رفێنراوەكان گەڕاونەتەوەو رزگاریان بوە.
4-تا ئێستا “35” مناڵ لەلایەن داعشەوە دەستگیركراون و لە سەربازگەی تایبەتا راهێنانیان لەسەر چەك پێدەكرێ‌ و هاوكات “9” ئافرەت لەناو زیندانەكانی داعش خۆیان كوشتوە.
5-پێش كۆمەڵكوژییەكەی گوندی كۆجۆ، “544” كەس لە ژن و مناڵ و پیرو پیاوو گەنج، دەربازبوون و رزگاریان بوەو نەكەوتوونەتە بەردەستی داعش.
6- پێنج “5” كەس لە بن دەستی داعش و “21” كەس لە شوێنی لەیەكتر جیاواز گیانیان لە دەست داوەو بەهۆكاری جیاجیا بوون بە قوربانی.
7-لە كۆی گشتی كۆمەڵكوژی گوندی كۆجۆ “42” مناڵ بێباوك بوون و “63” شەست و سێ‌ خێزان بەتەواوی تیاچوون، هەروەها “47” خێزان تەنها یەك كەسیان دەرچوەو “17” خێزان تەنها “2” كەسیان دەرچوەو “25” خێزان بەتەواوی دەربازبوون.
8-تا ئێستاش “284” كەس لەلای داعش بە زیندانیكراوی ماونەتەوە یان چارەنووسیان نادیارەو هەر جارەی هەواڵێك لە بارەی چارەنووسیانەوە بڵاو دەكرێتەوە.

بۆچوون